بسم الله الرحمن الرحيم
السلام عليكم ورحمة الله وبركاته
في البداية ارحب بالجميع وقبل ان ابدأ في حديثي :-
قال الله تعالى : [ما يلفظ من قول الا لديه رقيب عتيد]
كيا السعودية وما ادراك ما كيا السعودية , من بعد ما استلمت الوكالة سيارات الكيا
بعد ما اخذتها من الحاج حسين علي رضا والامر دمار في دمار والشكوى لله
بسرد لكم ما حصل لي , انا معي اوبريس موديل 2005 وساكن في السويدي
في السابق لما كنت عند الحاج كان يوجد فرع قريب لي في طريق الملك فهد
ولكن بعد ما انتقلت الى كيا السعودية اصبح لا يوجد الا فرع واحد وفي اخر خريص
وانواع المشاوير طبعا , في البداية سمعت صوت في السيارة فقلت اوديها الصيانة
طقينا مشوار الى كيا السعودية ولما وصلنا لهم جلست على المكتب وقدامي اخ سعودي
فبينت له الامر فقال اطلع الان مع واحد وقل له المشاكل , طلع معي شخص وقلت له المشاكل
وسجلها في الورقة وقال تعال معي , جيت معه ووقعت على دخول السيارة وقال بنتصل علي
جلست السيارة يومين بعد ذلك اتصلوا علي قفالوا السيارة خلصت قلت طيب جايكم
جيهتم وانا جالس عند الاخ احتري سيارتي جا شخص الظاهر من اهل الشام يعمل معهم
فكلم السعودي بصوت منخفض وانا اسمع وقال له بالحرف الواحد
عندنا سيارة من نوع اوبريس وفيه قطعة اسمها كذا [ما اذكر اسمها] وقريب وتتعطل
فما رايك اغيرها والا اخليها , فقال السعودي له اذا تكلف لا تغيرها واذا ما تكلف غيرها
انا من يوم ما سمعت هالكلام وانا غاسل يدي منهم , عموما طلعت الموتر واول ما مشيت
الامر زين شوي بس دقيقتين الا والصوت يطلع ووصلت البيت وللاسف ما سوو فيه اي شي يذكر
يعني بس دخلت عندهم وطلعت بدون اي فائدة
حسبي الله ونعم الوكيل عليهم
عموما بما اني احتاج السيارة فقلت لاحقا ندخلها لهم
جيتهم قبل حوالي 3 ايام يوم الثلاثاء الماضي سحبت على الدوام وطقيت مشوار
ولما وصلت لهم وكلمت نفس السعودي قال لي خذ موعد [انا اقول في نفسي مستشفى مب وكالة]
قلت له يا رجال انا جاي من السويدي وساحب على الدوام وفي الاخير تقول لي خذ موعد
قال ما اقدر قلت طيب انا جايكم المرة الماضية ليه ما قلتوا اخذ موعد , قال المواعيد بس في الزحمات
قلت له طيب انا ما ادري وش ذنبي اني اطق مشوار واسحب على دوامي وفي النهاية ما استفيد
قال كلم المدير ما نقدر نسوي لك اي شي , فرجعت وللاسف ما استفدت بتاتا 
هذا ما حصل لي بالضبط وعلى طاري هالموضوع كلمني احد الزملاء وقال لي
ان وكالة كيا السعودية بتفسخ الوكالة عن كيا , ابركها من ساعة :D
مهب كفو انها تاخذ وكالة على فرع واحد وخدمة سيئة جدا جدا
الله يعيننا واياكم
أبوهيثم 